„Исцелител“ на престижен филмски фестивал во Норвешка

Филмот „Исцелител“ на режисерот Ѓорче Ставрески е избран во официјална селекција на „Косморама“ во Трондхајм. По норвешката премиера на филмот во јануари на фестивалот во Тромсе, ова ќе биде негово второ прикажување во оваа земја.

„Исцелител“ ќе има три прикажувања за време на фестивалот, на 5, 9 и на 11 март.

Филмот е во програмата „Скроблик“ заедно со добитникот на многубројни награди, англиско-францускиот хит „Смртта на Сталин“ на Армандо Ианучи и со наградениот филм на филмскиот фестивал во Филаделфија, колумбискиот „Лошата среќна коза“, на Самир Оливерос и други.

Филмскот фестивал „Косморама“ постои од 2005 година и во изминатите години го зазема местото на еден од најголемите и најактуелни филмски настани во Норвешка. На „Косморама“ досега присуствувале Лив Улман, Александдар Пејн, Мохсен Махмалбаф и други значајни имиња од филмската уметност. Во склоп на фестивалот се одржуваат и филмски маркет и форум.

Филмот „Исцелител“ досега освои повеќе награди и признанија, меѓу кои позначајни се главната награда на публиката на Солунскиот филмски фестивал и наградата за најдобар меѓународен филм на меѓународниот филмски фестивал во Санта Барбара, Калифорнија. Исто така, филмот доби и „Златна бубамара“, а на истиот настан главниот актер Благој Веселинов беше прогласен за актерско откритие на годината.