Владата бара консултанти за продажба на „Еурокомпозит“, „Колска“ и ски-центарот „Попова Шапка“

На Електронскиот систем за јавни набавки Владата објави оглас за консултантски услуги за продажба на 3 фирми во државна сопственост. Според тендерската документација што ја објави Генералниот секретаријат на Владата, станува збор за Фабриката за шински возила „Велес“, позната како „Колска“, прилепскиот загубар „11 Октомври – Еурокомпозит“ и ски-центарот „Попова Шапка“.

Проценетата вредност на договорот е 15 милиони денари без ДДВ, или приближно 244 илјади евра. Критериум за доделување на договорот е најповолната економска понуда, при што цената учествува со 60 бодови, а квалитетот со 40.

Состојбата во овие фирми со години е неизвесна. Вработените од „Колска“ на железничката станица во Велес неколкупати блокираа возови поради неисплатени плати. Приближно 260 вработени во фабриката „Еурокомпозит“ во март годинава имаа побарувања од 16 неисплатени заостанати плати и неисплатени придонеси од јуни 2012 година. Генералниот директор Александар Кузески поднесе неотповиклива оставка.