(Видео)„И да гори, не влегувам пак во Собранието“, вели обвинетиот кој призна вина за насилство

Oбвинетиот Стојан Павлевски, кој призна вина за насилствата од крвавиот четврток, вели дека се кае за делото и дека нема да го повтори. Тој во изјава за медиумите рече дека никој не му наложил да влезе во Собранието на 27 април. Очекува условна казна.

„И да гори, нема да влезам. Тогаш ме испровоцира пеењето на албанската химна. Нема да го повторам делото, очекувам условна казна“, рече Павлески. Тој заедно со Цејо Ѓоргиевски ја признаа вината за насилство кога делото беше преквалификувано од обид за убиство во насилство.

Адвокатите побараа судот да ги земе предвид олеснителните околности, односно здравствената состојба и неосудуваноста на обвинетите во изрекувањето на казната.

Обвинителот, пак, во завршните зборови порача дека очекува соодветна казна за делото што го сториле и потсети дека биле свесни што прават кога влегле во Собранието и кога фрлале предмети врз пратениците.

„Било какво алтернативно казнување значи банализизација на тежината на целиот настан. Ако вака се влегува и насилнички се однесуваат во законодавниот дом се поставува прашањето дали било која друга институција или објект е безбеден. Обвинетите биле свесни дека не учествуваат во протест туку во диркетно напаѓање на пратениците“, рече обвинителот Дарко Јакимовски.

За делото за кое им се суди е предвидена казна од 6 месеци до 5 години затвор. В среда се очекува да им биде изречена пресудата.