Кисела Вода бара решение за проблемите со Центарот за зависности

Вчера се одржа првата, иницијална средба за надминување на проблемот кој со години го имаат жителите на Кисела Вода, поврзан со Центарот за превенција и третман на зависности од дроги, лоциран на ова подрачје.

„Како иницијатор, инсистирав на состанокот да присуствуваат сите засегнати страни, што значи дека учество во дискусијата ќе земат и претставниците од Министерството за здравство, од Министерството за внатрешни работи, конкретно од СВР Скопје, од Оддделението за недозволена трговија и од ПСОН Кисела Вода, претставници од ЈЗУ Психијатриска болница Скопје, од Центарот за превенција и третман на зависност од дроги-Кисела Вода, невладините организации ХОПС и Доверба, и секако претставници на жителите од овој дел на градот кои задно со нас, како локална самоуправа се најзасегнати од ова прашање“, истакна градоначалникот Филип Темелковски на почетокот на работниот состанок во општината.

Тој назначи дека иако ингеренциите за надминување на проблемот се во рацете на други институции, сепак, како прв човек на Општината каде се наоѓа Центарот за зависности чувствува одговорност да реагира и да преземе активности бидејќи во Општината секојдневно пристигнуваат поплаки од локалното население за расфрлен медицински отпад, висока стапка на криминални активности и нарушувања на јавниот ред и мир.Во текот на дебатата беа отворени повеќе прашања кои опфаќаат повеќе аспекти на проблемот и повеќе можности за нивно надминување.

Државниот секретар од Министерството за здравство говореше за третманот на овие пациенти, за функционирањето на Центарот и за потребата од носење на долгорочно квалитетно решение кое ќе биде во интерес на сите. Жителите на Кисела Вода кои беа присутни истакнаа дека иако чувствуваат емпатија кон оваа категорија на луѓе, чувствуваат емпатија и кон своите деца и соседи и дека нивното секојдневно живеење во близина на оваа институција е ризично и неподносливо. Јасно и децидно истакнаа дека бараат институциите да изнајдат решение. Претставниците од Центарот и од од ЈЗУ Психијатриска болница Скопје укажаа на проблемите со кои тие се судираат, како на пример, зголемениот број на пациенти и недостигот од време за индивидуална работа со нив.

Се говореше и за потребата од категоризација на пациентите, бидејќи голем дел од нив редовно ја земаат терапијата и никому не прават проблеми, но постои група која е криминогена и која не е ниту на прагот на ресоцијализација и интеграција во општеството. Сепак, заклучија и дека честопати таа линија знае да биде многу тенка и лесно премостива кога лицето ќе се најде во криза.Од страна на невладините организации ХОПС и Доверба кои работат со оваа категорија на лица беше истакната потребата од психосоцијална поддршка за истите, како и поголема информираност кај населението, но и кај институциите за потребите за подобрување на третманот на зависниците. Говореа за позитивни примери и за тоа како изгледаат третманите во поразвиените земји.

Претставниците од МВР, рекоа дека и досега и од сега на располагање ги стават своите капацитети во насока на превенција но и справување со последиците од зголемениот криминал во близина на Центарот за зависности. Сепак, и тие се согласни дека е потребно долгорочно системско решение во кое повеќе инстутиции ќе дадат свој удел.

Присутните граѓани му се заблагодарија на градоначалникот Темелковски за брзата реакција на нивните барања и за овој прв чекор поради кој се надеваат дека истиот ќе води кон финално решение. Тој пак, се заблагодари за досегашната конструктивност на сите чинители во делувањето за изнаоѓање на решение. Од страна на државниот секретар од Министерството за здравство беше дадено ветување дека во наредните 30 дена ќе има засилени активности за анализи и одлуки за решавање на проблемот. Во тој правец, тој најави поединечни и групни состаноци со сите засегнати страни, подигнување на проблемот на повисоко, Владино ниво и непрекината комуникација со Општина Кисела Вода. Следната средба ќе се случи по завршувањето на предвидените активности во зададениот рок од тие триесетина дена.