Мицкоски повика на протест во Кавадарци

Нема ниту датум за преговори со ЕУ ниту безусловна покана за НАТО затоа што имаме неспособна Влада, повикувам на протест во Кавадарци в недела во 13 часот, изјави лидерот на ВМРО-ДПМНЕ, Христијан Мицкоски, во видеообраќање.

„Ќе продолжиме да протестираме. Ве повикувам оваа недела во 13 часот во Кавадарци на протестен марш, кој ќе започне од кружниот тек „Сашко Гешковски“ до спомен-плочата и паметникот во Кавадарци посветен на формирањето на првиот комитет на ВМРО по Солунскиот“, најави Мицкоски.

Претседателот на ВМРО-ДПМНЕ додаде дека СДСМ дојде на власт со ветување за подобар живот и повисоки плати, но сега молчи за неправдите, а ладнокрвните убиства ги третира како статистичка евиденција во црните билтени.